RIHA - Aktivîsta TJA'yê Ayla Akat Ata ku di mîtînga Rihayê de axivî, destnîşan kir ku heya li Îmraliyê tecrîd hebe aştî çênabe. 

 

Platforma Saziyên Demokratîk ji bo 1'ê Îlonê Roja Aştiyê ya Cîhanê li Parka Riha Novada bi dirûşmeya “Ji bo Civaka Demokratîk Deng Bidin Aştiyê” mîtîngek li dar xist. Aktivîsta Tevgera Jinên Azad (TJA) Ayla Akat Ata, Hevseroka Konfederasyona Sendîkayên Karmendên Giştî (KESK) Ayfer Koçak, Hevserokê Giştî yê Partiya Wekhevî û Demokrasiyê ya Gelan (DEM) Tuncer Bakirhan, parlamenterên Rihayê yên DEM Partiyê Dîlan Kunt Ayan û Omer Ocalan, birayê Rêberê Gelê Kurd Abdullah Ocalan Mehmet Ocalan, Meclisa Dayikên Aştiyê, endamên rêxistinên bajar û navçeyan ên Partiya Herêmên Demokratîk (DBP) û DEM Partî, rêxistinên civaka sivîl û bi deh hezaran kes beşdarî mîtîngê bûn. Bi hezaran kesan dirûşmeyên “Bijî Serok Apo”, "Bê Serok Jiyan nabe” û “Jin jiyan azadî” berz kirin.

 

Hevseroka DEM Partiyê ya Rihayê Ayşe Surucu di mîtîngê de axivî û diyar kir ku ew di rojên dîrokî re derbas dibin û got, “Di 27ê Sibatê de di bin serokatiya Rêberê Gelê Kurd Abdullah Ocalan de pêvajoyek nû dest pê kir. Em ji vê pêvajoyê bi hêvî ne. Divê azadiya fîzîkî ji birêz Ocalan re were dayîn da ku di şert û mercên rehettir de bixebite.”

 

Aktîvîsta TJA'yê Ayla Akat Ata diyar kir ku îro her kes dê dengê xwe ji bo aştiyê bilind bike û got: “Werin em hemû bi hev re dengê xwe bilind bikin û silavên xwe ji çar aliyên Kurdistan, Tirkiye, Rojhilata Navîn û cîhanê re bişînin. Her kesê ku di bin zilmê de ye wateya Roja Aştiyê dizane. Ji Rihayê heta Îmraliyê, em silavên xwe ji Rêberê Gelê Kurd birêz Abdullah Ocalan re dişînin. Werin em bi hev re bibêjin bijî aştî. Bila ji bo me hemûyan rojek pîroz be. Îşev, li vê meydanê, em ê hemû bibêjin aştî. Îro, 1ê Îlonê, Roja Aştiyê ya Cîhanê li vir wateyeke nû digire. Ev erdnîgarî bi hewldanên me wateyeke nû dide Roja Aştiyê ya Cîhanê.”

 

Ayla Akat Atayê destnîşan kir ku heya li Îmraliyê tecrîd hebe aştî çênabe û got ku heya kesên siyaseta demokratîk dikin girtî bin aştî çênabe. 

 

Ayla Akat Atayê herî dawî strana "Welatê Me Kurdistan e" got. 

 

PEYAMA ABDULLAH OCALAN

 

Piştî axaftina Ayla Akat Atayê, Parlamentera DEM Partiyê ya Rihayê Dîlan Kûnt Ayan, peyama 1'ê Îlonê Roja Aştiyê ya Cîhanê ya Rêberê Gelê Kurd Abdullah Ocalan xwend. Peyama Abdullah Ocalan bi vî rengî ye:

 

“Ji kesên bo aştî û demokrasiyê têdikoşin re...

 

Banga me ya ji bo aştî û çareseriyeke demokratîk, ne gaveke siyasî ya jirêzê ye; gaveke stratejîk e û qonaxeke dîrokî ye. Bi vê bangê re hem li Tirkiyeyê hem jî li seranserî Rojhilata Navîn, deriyên serdemeke nû ya jiyaneke demokratîk a ser bingeha aştiyê heta dawiyê hatine vekirin ku dê şûna şer û wêraniyan bigire. 

 

Ev, ne tenê daxwazek e; rastiyeke şênber e ku divê bi derfetên xurt û gavên pratîkî yên cidî were avakirin. Ji ber ku aştiyeke rasteqîn, tenê bêdengbûna çekan an jî bidawîbûna pevçûnan nîne. Aştiya rasteqîn, wê demê pêkan e dema azadî, demokrasî û edaleta civakî di hemû qadên jiyanê de ava bû. 

 

Veguherîna civakî ji bo gelên me ne tenê mafek e; di heman demê de peywira sereke ya serdema nû ya pêşiya me ye. 

 

Aştî, demokrasî û nirxên azadiyê dê bi têkoşîna gelên me re teqez mayinde bibin û di nava jiyana civakî de cihê xwe bigirin. Ev welat êdî dê bibe welatê wan kesan ên ku aştî û jiyana demokratîk hem weke mafê xwe hem jî peywira xwe dibînin. 

 

Bi wesîleya 1’ê Îlonê ez bang li gelên me dikim ku xwedî li vê peywira dîrokî derkevin û meşa aştî û azadiyê hêj bêhtir mezin bikin. 

 

Di wê baweriyê de me ku hemû kes dê cidiyeta vê serdemê fêm bike, xwe li ber çavan derbas bike û li gorî ruhê aştiyê tevbigere. Bi vê baweriyê, ez we hemûyan bi hezkirin û rêzên xwe yên bêdawî silav dikim. 

 

Abdullah Ocalan

 

Girava Îmraliyê.”