NAVENDA NÛÇEYAN - Komeleya Mafên Mirovan (ÎHD) û xizmên windayan ji bo aqûbeta windayan bipirsin û ji bo darizandina faîlan li Amed, Êlih, Colemêrg û Îzmîrê hatin ba hev.

 

Komeleya Mafên Mirovan (ÎHD) û xizmên windayan ji bo aqûbeta xizmên xwe yên hatine windakirin û qetilkirin bipirsin û ji bo darizandina kiryarên wan, li 3 bajaran çalakiyên xwe domandin.

 

AMED

 

Xizmên windayan û Şaxa ÎHDê ya Amedê bi boneya winda bên dîtin û kujer bên darizandin li Parka Koşuyolu kom bûn û li ber Bîrdariya Mafê Jiyanê çalakiya xwe berdewam kirin. Di çalakiya vê hefteyê de akûbeta Ali Îhsan Dagli yê ku di 14 Nîsana 1995an de li Farqînê di bin çavan de hate windakirin pirsîn.

 

Hevserokê Şaxa ÎHDê ya Amedê Ercan Yilmaz daxuyanî da. Ercan Yilmaz diyar kir ku nêzî heft mehan e ku nîqaşên çareserkirina pirsgirêka Kurd bi rêyên diyalog û muzakereyê tên kirin û got:” Ev hêviyê dide me. Ji bo çareserkirina pirsgirêkê destpêkê hewcedarî bi rabirdûyê re rûbirûmayînê heye. Gere dewlet komisyona edalet û bi rabirduyê re rûbirûmayinê ava bike.”

 

Parêzer Berfîn Elçî, çîroka Ali Îhsan Dagli xwend. Berfîn Elçî diyar kir ku Dagli fi 14 Nîsana 1995'an de tê binçavkirin û piştre tê wendakirin û got: “Li gor nûçeya rojnameya Evrenselê ya di 11'ê Cotmeha 1997 an de Malbat ji ber ku serî li ÎHDê dide hêzên dewletê di ser gund de digirin û li hember malbatê tundiyê bikar tînin. Dîsa di heman nûçeyê de wêneya Ali İhsan Dagli ya ku dema dibin çavan de bûye tê parvekirin û bi vî awayî inçavkirina wî tê belgekirin. Di wêneyê de dixuyê ku deste Ali İhsan Dagli pêçayî ye. Malbat di 16'ê Cotmeha 1997'an de bi vê wêneyê serî li şaxa ÎHDê ya Amedê dide.

 

Berfîn Elçiyê diyarkir ku malbatê serî li hemû mekanîzmayên hiqûqê daye lê tu encam negirtiye û got: Doz biriye Dadgeha Mafê Mirovan ya Ewropayê (AİHM) û AİHMê Tirjiye mehkûm kiriye. Divê akubeta windayan bê aşkerekirin û kujer bên darizandin.

 

ÊLIH

 

Li Êlihê jî Şaxa ÎHD’ê û xizmên windayan bi daxwaza “Bila winda bên dîtin, faîl bên darizandin” cara 680’an li Cadeya Gulistan hatin ba hev. Xizmên windayan û parêzvanên mafên mirovan di çalakiya vê hefteyê de aqûbeta Ahmet Bûlmûş pirsîn ku 1’ê Nîsana 1994’an li navçeya Cizîr a Şirnexê piştî hate binçavkirin êdî agahî jê nehat girtin. Ji Rêveberiya Şaxa ÎHD’ê Rezan Baytar çîroka Bûlmûş xwend. Daxuyanî bi çalakiya rûniştinê bi dawî bû.

 

COLEMÊRG

 

Şaxa ÎHD’ê ya Colemêrgê û xizmên windayan, di hefteya 170’an a çalakiya xwe de li Kolana Hunerê ya li navçeya Geverê hatin ba hev. Di çalakiyê de wêneyên windayan hatin hilgirtin. Hevşaredarên Geverê, endamên rêxistina DEM û DBP’ê yên navçeyê û gelek kes beşdarî çalakiyê bûn. Di çalakiya vê hefteyê de kujerên Fahrettîn Şedal hatin pirsîn ku 24’ê Adara 2008’an li Geverê di encama gulebarana polîsan de jiyana xwe ji dest da. Endamê Şaxa ÎHD’ê Ozan Akbaş çîroka Fahrettîn Şedal ê bavê 6 zarokan, vegot. Piştî daxuyaniyê, çalakiya rûniştinê hate lidarxistin.

 

ÎZMÎR

 

Di çalakiya li ber Sumberbanka berê ya Konakê hatî kirin de, pankartên “Winda wijdan in, xwedî lê derkeve” û “Faîl diyar in, winda li ku ne” hatin vekirin. Vê hefteyê çîroka Sabahattîn Kurt ê ku 30’ê Adara 1972’yan li Kizildereyê hatî qetilkirin, hate vegotin. Daxuyanî piştî çalakiya rûniştinê ya bi 5 deqeyî, bi dawî bû.