EDENE - Xebatkarê Rojnameya Azadiya Welat Metîn Alataş ê ku 15 sal berê hate qetilkirin li ser gora xwe hate bibîranîn.
Xebatkarê rojnameya Azadiya Welat Metîn Alataş ê ku 15 sal berê li Edeneyê hat qetilkirin cenazeyê wî li baxçeyekî pirteqalan bi darekê ve daliqandî hat dîtin, li ser gora xwe ya li Goristana Kuçukoba hat bîranîn. Di bîranînê de malbata Alataş, Cemiyeta Rojnamegerên Dicle Firat, Komeleya Alîkarî û Piştgiriyê ya bi Malbatên Xizmên Xwe Windakirine (AYKAY-DER), Komeleya Alîkarî û Piştgiriyê ya Bi Malbatên Girtî û Hikumxwaran re ya Akdenîzê (AATUHAY-DER), Rêveberên Partiya Wekhevî û Demokrasiyê ya Gelan (DEM Partî) a Edeneyê amade bûn.
Di bîranîna ku bi deqeyek rêzgirtinê ya li ser gora Alataş a li Goristana Kuçukoba destpê kir de Hevserokê AYKAY-DER'ê Mûstafa Yildiz axivî û destnîşan kir ku kevneşopiya Çapemeniya Azad wê bidome û wiha got: "Nikarin Çapemeniya Azad bêdeng bikin. Ew bi xwe jî gelekî baş bi vê dizanin. Ji bo careke din tiştekî bi vî rengî neqewime, em dixwazin mesajekê bidin; hûn nikarin û tu carî çapemeniya azad bêdeng bikin. Em li vir peyamê didin ku ev kevneşopî wê bidome. Em ê şehîdên xwe ti carî ji bîr nakin, em li pey şopa şehîdên xwe ne."
Hevserokê DEM Partiyê yê Navçeya Edene Seyfettîn Aydemîr da zanîn ku Metîn Alataş ji bo rastiyan ji raya giştî re ragihîne xebitî û wiha got: "Di dema şerê qirêj de xebatkarên Çapemeniya Azad hewl didan rastiyê aşkera bikin û radestî raya giştî bikin. Lê hêzên tarî nexwestin rastî derkevin holê û hevalê me ji aliyê hêzên kontra ve hat qetilkirin. Em careke din di şexsê Metîn Alataş de hemû şehîdên Çapemeniya Azad bi rêzdarî bi bîr tînin. Çapemeniya Azad ti carî nikare bê bêdengkirin. Hevalên me wê di rêya wan de berdewam bikin. Ji malbat û gelê me re sersaxiyê dixwazin."