STENBOL - Di îdianameya rojnameger Necla Demîrê de bernameyên têkildarî tundî û binpêkirinên mafên jinan weke sûc hatin nîşandan. Ji bo Xwediyê Produksiyona Medya Guncelê Welat Ekîn jî îdiaya “rayedarê Medya Haberê” hat kirin.
Rojnameger Necla Demîr Arvas di 17’ê Çileyê di çarçoveya lêpirsîna Serdozgeriya Komarê ya Stenbolê di serdegirtina malê de hate binçavkirin. Necla Demîr, di 20’ê Çileyê de bi îdiaya “endamtiya rêxistinê” hate girtin û niha li Girtîgeha Jinan a Bakirkoyê tê ragirtin. Lêpirsîna der heqê Necla Demîr de hate temamkirin. Serdozgeriya Komarê ya Stenbolê îdianameyeke ji 53 rûpelan pêk tê amade kir û cih da dîrokçeya PKK/KCK’ê û avadaniya wê ya rêxistinî.
Di îdianameyê de bernameya “Polîtîk Kadin” a Necla Demîr pêşkeş dike jî cih girt. Di îdianameyê de hate gotin ku Medya Haber TV hevpeyvînên bi rayedarên PKK û KCK’ê re parve dike û parvekirina bernameya “Polîtîk Kadinê” ya di vê TV’yê de weke “têkiliya rêxistinî” hate îdiakirin. Di îdianameyê de hate îdiakirin ku Medya Haber TV weşanên “pesnê rêxistinê” didin û “piştgiriyê didin rêxistinê” dike. Lê belê di îdianameyê de nehat diyarkirin bê ka Necla Demîr di bernameyê de çi îfadeyên “pesindayin û piştgiriya rêxistinê” bi kar aniye.
Di îdianameyê de 8 bernameyên Necla Demîrê weke “delîl” cih girtin û ne gotinên Necla Demîr ên di bernameyê de lê gotinên mêvanên wan weke “sûc” hatin nîşandan. Di îdianameyê de qeydeke telefonê jî cih girt û axaftina Necla Demîrê ya bi mêvanê bernameyê re weke sûc hate nîşandan.
‘ROJEVÊN JINAN’ WEKE SÛC HATIN NÎŞANDAN
Di îdianameyê de rojevên têkildarî jinan ên Necla Demîr di bernameya “Polîtîk Kadin”ê de li ser sekinî weke delîlên sûc hatin nirxandin. Di îdianameyê de mijarên weke Roja Têkoşîna li Dijî Tundiya Ser Jinan a 25’ê Mijdarê, veneqetandina bûdçeyê ya ji bo jinan, binpêkirinên mafan ên di sala 2023’yan de, bernameya têkildarî komkujiyên ser jinan, xebatên sivik û jidûrve, çalakiyên jinan ên li dijî tundiyê, tundiya jin li herêma erdhejê rû bi rû man, nîqaşên ser destûra binehîn û bernameyên têkildarî tecrîda li ser Rêberê PKK’ê Abdullah Ocalan weke sûc di îdianameyê de cih girtin.
Ji ber gotinên mêvanan ên di bernameyên behsa xeberê de û weşandina bernameyan a ji hêla Medya Haber TV’yê ve îdiaya “endamtiya rêxistinê” hate kirin û hat xwestin ku Necla Demîr were cezakirin.
Îdianame ji hêla 23’yemîn Dadgeha Cezayên Giran a Stenbolê ve hate qebûlkirin.
JI BO EKÎN GOT ‘RAYEDARÊ MEDYA HABERÊ’
Der heqê rojnameger Welat Ekîn de ku di çarçoveya heman operasyonê de hate binçavkirin jî îdianameya ji 8 rûpelan pêk tê hate amadekirin. 4 rûpelên îdianameyê ji dîrokçeya PKK/KCK’ê pêk tê. Tevî ku Ekîn rayedarê Produksiyona Guncelê ye û ewraqên fermî hene jî di îdianameyê de Ekîn weke rayedarê Medya Haber TV’yê hate nîşandan.
Ekîn ku beriya xebata Produksiyona Guncelê demekê li Ajansa Mezopotamyayê (MA) nûçegihantî kiribû. Qerta saziya MA’yê ya li ser Ekîn hatiye girtin jî di îdianameyê de weke “delîl” hate nîşandan.
Bi hincetên li jor hatine destnîşankirin, ji bo Ekîn îdiaya “endamtiya rêxistinê” hate kirin.
Îdianameya Ekîn ji hêla 23’yemîn Dadgeha Cezayên Giran a Stenbolê ve hate qebûlkirin.
MA / Dîren Yurtsever