Civînên di çarçoveya Aştî û Civaka Demokratîk de hatine destpêkirin, didomin. Di vê çarçoveyê de bi hezaran civîn hatin lidarxistin û Kongreya Demokratîk a Gelan (HDK), li Egeyê û li Behra Reş li gelek bajaran bi gel re civiyan.

 

Hevberdevkê HDK’ê Alî Kenanoglu, geşedanên têkildarî pêvajoyê  û mijarên ku di civînên gel de hatin rojevê nirxad û destnîşan kir ku ji bo pêvajo bi awayeke rêk û pêk bidome divê Rêberê Gelê Kurd Abdullah Ocalan, bi awayek çalak di nava pêvajoyê de cih bigire. 

 

Kenanoglu, diyar kir ku çûyîna Şandeya Îmraliyê ya Partiya Wekhevî û Demokrasiyê ya Gelan (DEM Partî) têr nake û wek HDK dixwazin bi Ocalan re hevdîtinê bikin.

 

Kenanoglu, destnîşan kir ku divê Komîsyona Hevgirtina Neteweyî, Xwişk-Biratî û Demokrasiyê bi Ocalan re hevdîtinê bike û ev tişt got: “Divê komîsyon, hesasiyet, bendewariyên gel bîne ziman û ji bo pêşveçûna pêvajoyê sererastkirinên qanûnî bike. Ji ber vê yekê hevdîtina bi rêzdar Ocalan girîng e. Pişt re divê em jî karibin bi rêzdar Ocalan re hevdîtinê bikin.”

 

‘RAPOR JI BO OCALAN TÊN ŞANDIN’

 

Kenanoglu, rave kir ku ji bo civakîkirina aştiyê dixebitin û niha xebatên wan li Tokat’ê didome û wiha got: “Li vir em li gund, li bajarok û navenda Tokat’ê civînan li dar dixin. Em wek HDK, ji gel re qala girîngiya pêvajoyê û qonaxên wê yên pêşerojê dikin. Em fikar, pêşniyar û rexneyên gel rapor dikini. Ev rapor dê ji bo rêzdar Ocalan tên şandin. Têkildarî vê mijarê de agahî bi rêzdar Ocalan re tê parvekirin.” 

 

ÇAVDÊRIYÊN BEHRA REŞ

 

Kenanoglu, der heqê civînên li herêma Behra Reş ev tişt got: “Em li Behra Reş gund bi gund digerin. Tiştên ku em li wir dibînin; gelek bendewariyên civakê ji tevgera Kurd heye. Berevajî desthilatê, gel li li vir wek desthilatê pêvajoyê bi ‘Tirkiyeya bêteror’ pênase nake. Lêbelê di warê pêkanîna pêvajoyê de fikar û bêbaweriya wan hene. Ev bêbawerî ne li hemberî me ye, ji desthialtê bêbawer in. Li gorî çavdêriya me li Behra Reş bereksa gotina ‘Tirkiyeya bêteror”, gotina me ya aştî û demokrasiyê li vir bêtir hêvî geş kiriye.” 

 

GAVÊN PÊWÎST 

 

Kenanoglu, divê pêvajoya guhdarkirinê dirêj neke û wiha pê de çû: “Divê komîsyon pêvajoya guhdarîkirinê zêde dirêj neke û têkildarî pirsgirêka Kurd gavên şênber biavêje û biryaran bide. Serokê Meclisê Numan Kurtulmuş, anî ziman ku piştî vekriina Meclisê ji bo pêşveçûna pêvajoyê dê di Qanûna Têkoşîna Li Dijî Terorê, Qanûna Înfaza Cezayê, mijara qeyûman, rewşa girtiyên nexweş û di rewşa girtiyên siyasî de hinek gavên qanûnî biavêjin. Divê erka sereke ya komîyonê ev be. Du mijarên girîng hene ji bo komîsyonê. Yekemîn, divê bi rêzdar Ocalan re hevdîtinê bike ya duyemîn jî divê ji bo qanûna ku dê li Meclisê bê derxistin, xebatan bike. Ger ev gav bên avêtin dê pêvajo bi awayeke rêk û pêk bidome.”

 

Kenanoglu, helwesta desthilatê ya li dijî Bakur û Rojhilatê Sûriyeyê rexne kir û wiha dawî li axaftina xwe anî: “Divê desthilat hebûna gelê Kurd ê li Sûriyeyê qebûl bike. Divê Tirkiye dev ji van hewldanan ber de. Em rexne û pêşniyarên gelê me guhdar dikin. Em ê ji bo aştiyê çi bikeve ser milê me bi cih bînin.”

 

MA / Melîk Çelîk