Jinên ku li Komeleya Piştgiriya Jinan a Yaşamevi ya li Rihayê dicivin, hem hilberînê dikin û hem jî bi saya piştgiriyê hêzê ji hev digirin. Bi beşdarbûna atolyeyên kardestî, wênesaziyê û muzîkê û bi rêya semîneran li ser mafên xwe yên qanûnî û tenduristiya serwext dibin. 

 

Heyecan Seydan ku nêzîkî çar salan e li komeleyê gelek atotlyeyan li dar dixe, got ku jinên ku beşdarî atolyeyan wê dibin bi demê re di wan de guherîn û veguherîn çêdibe. Heyecan Seydanê rave kir ku berhemên ku ew çêdikin jî tên firotin û got: "Pir xweş e ku em ji karê xwe dahatê qezenc dikin. Ne tenê xebatên atolyeyê ne. Em sohbet dikin û pirsgirêkên xwe parve dikin, li ser jiyan, cîhan û bûyerên heyî nîqaş dikin. Dema ku em diaxivin, em fêm dikin ku ezmûnên bi vî rengî çêbûne. Hin jin îstîsmara psîkolojîk a ku ew rastî wan hatine fam nakin. Mînak, heta jin hebûn ku destûr nehatibû dayîn ku werin vir. Mirov pir caran pê nizanin ku ew zexteke psîkolojîk e. Em li vir bi hev re fêr dibin."

 

ÎLHAMÊ JI HEV DIGIRIN 

 

Heyecan Seydan anî ziman ku nêzîkî 30 jin beşdarî bernameyên perwerdehiyê yên komeleyê bûne û got: "Jinên ku vê derê dibînin pir caran wê ji heval û cîranên xwe re pêşniyaz dikin û ew jî dest bi hatinê dikin. Ew bi nihêrîna hev motîve dibin. Ew ji hev îlhamê digirin. Em mezin dibin û xweşiktir dibin. Em her wiha hevgirtinê pêş dixin."

 

Leyla Yilmaz ku bi salan hemşîretî kiriye, piştî teqawidbûna xwe beşdarî atolyeyên komeleyê bûye. Leyla Yilmaz ku dawiya hefteyê li komeleyê ye, destnîşan kir ku beşdarî gelek atolyeyan bûye û got ku destdayîna jiyana kesekî din tiştekî xweş e û ew hêzê ji hev digirin û xurt dibin. 

 

Leyla Yilmazê destnîşan kir ku jin rastî gelek cureyên tundiyê tên lê di naskirina wan de zehmetiyan dikişînin û got: "Me fêm kir ku hebûn di jiyanê de çiqas girîng e û nebûna baweriya bi xwe ji hêla civakê ve di bingeha xwe de di me de tê çandin. Di dema perwerdeyê de, me alîkariya hev kir ku em baş bibin. Bi salan, ez jî yek ji wan kesan bûm ku carinan gotina 'Jin ji bo hev gur in' bi kar dianî ku belkî ji zarokatiyê ve ji me re hatibû gotin. Bi komeleyê re, min hêza jinan dît. Jin bi dilgermî dixebitin da ku hev du bilind bikin. Gelek jinên ku tên vir, erê, ew tên ku tiştek fêr bibin, lê ew di heman demê de tên ku kêmasiyên xwe çareser bikin û hêza xwe nîşan bidin."

 

Ozlem Polatê ku beşdarî ku xebatên komeleyê bû got ku wê piştî xwişka wê beşdarî avakirina komeleyê bûye, komele kifş kiriye. Ozlem Polatê got ku çalakiyên komeleyê yên ku xwişka wê behs kiriye bala wê kişandiye û wiha domand: "Min meraq dikir ka jin dema ku dicivin çi dikin. Ez çend caran bi xwişka xwe re çûm û hatim. Ji ber pirsgirêkên lênêrîna zarokên min û veguhastinê, min dest bi çûn û hatinê kir. Min berê jinên di komeleyê de nas kiribû. Me hevaltiyên baş ava kirin. Çalakî û qurs hebûn û çûn û hatin kêfxweş bû." 

 

Ozlem Polatê destnîşan kir ku ew bi xebat û sihbeta bi jinan re kêfxweş dibe û bi taybetî beşdarî xebatên muzîkê dibe. 

 

MA / Sema Bîngol