Abdullah Ruzgar di sala 1994’an de li Êlihê hate binçavkirin û bi îdiaya “Xerakirina yekitî û yekparetiya dewletê” cezayê muebbedê lê hate birîn. Ruzgar ku cezayê 30 salan temam kir, ji ber du cezayên disiplînê 31 salan de girtîgehê de ma. Ruzgar, di van 31 salan de li girtîgehên Êlih, Amed û girtîgehên Bartinê hate ragirtin. Ruzgar ku li Girtîgeha Hejmar 2 ya Tîpa F a Kandirayê dihat ragirtin û li wir 22 salan ma, 2 roj piştî “Banga Aştî û Civaka Demokratîk” a Rêberê Gelê Kurd Abdullah Ocalan anku di 29’ê Sibatê de hate berdan.  Ruzgar, di 25 saliya xwe de kete girtîgehê û di 56 saliya xwe de derket. 

 

Ruzgar, anî ziman ku dema vegeriyayî Êlihê dîtiye ku bajar mezin bûye û mala wan a kerpîçan jî guheriye. Ruzgar, got ku dema zarok dîtî, mala zarokatiya wî lê derbas bûye hatiye bîra wî û got: “Nikarim hestên xwe vebêjim.” 

 

Bi domdarî Ruzgar anî ziman ku salên hatibû girtin “salên serhildanê” bûn û wiha pê de çû: “Li hinek deverên Kurdistanê Hîzbulkontra û JÎTEM hebûn. Xelkê me dikuştin. Wê demê mamê min û pismamê min jî hatin kuştin. Mehek piştre jî hatim girtin. Wê demê her kesên xwedî wijdan tev li şoreşê dibû. Lewma ji destpêka partiyê heta niha malbata min di nav şoreşê de cih girt. Heta welatê me azad dibe jî dê wiha be. Wê demê hin kes bi hestên xwe tev li bûn lê ya me ne wisa bû. Me partî baş nas dikir. Hem zilm li me dihat kirin hem jî nasnameya me nedihat qebûlkirin. Cihgirtina di nava şoreşê de peywira me bû.” 

 

'MÎRATEYA ZINDANÊ YA 1980’AN JI BO ME BÛ HÊZ’ 

 

Di berdewamê de Ruzgar destnîşan kir ku tecrûbeya wî ya li girtîgehê di wî de guherîn û veguherîn çêkiriye û got: “Nêrîna me hinek biçûk lê mezin bû. An jî tu bibêjî ‘tiştekî binirxîne’ ez dikarim niha baştir binirxînim. Tu di nava gel de dikarî bêhtir tiştan bibêjî. Vê pêşketina di girtîgehê de ez li ser pêyan hiştim. Jixwe têkoşîna zindanan di sala 1980’ê de dest pê kir. Di esasê xwe de ew mîrateya me ye. Ew mîrate ji bo me bû hêzeke mezin.” 

 

Ruzgar, bal kişand ser têkiliyên xurt ên rêhevaltiyê yên li girtîgehê û ev tişt anî ziman: “Piştî ji girtîgehê derketim, hişê min her li ser hevalên girtî ne. Ev hest nayê vegotin.”

 

'GIRTÎGEHAN BANG JI DIL Û CAN PÊŞWAZÎ KIRIN’ 

 

Ruzgar, da zanîn ku ji bo tehliyeya wî 2 roj mabûn ku Abdullah Ocalan banga dîrokî kiriye û ev tişt anî ziman: “Em li bendê bûn ku Rêbertî tiştekî wiha bibêje. Heta me digot; ‘Dê Rêbertî tiştekî wisa bibêje ku her kes dê mat bibe.’ Ji ber ku Serokatî her tim wiha dike. Hevalên me ji bo vê amade bûn.  Heval, pêvajoyê esas digirin. Banga Serok ji dil û can qebûl kirin. Me tenê tiştek got; divê em li derve gelê xwe bêhtir birêxistin bikin û pêvajoyê vebêjin. Şoreşa esasî niha dest pê dike. Heke em di vê pêvajoyê de gel birêxistin bikin, bi gel re parve bikin, dê dewlet mecbûr bimîne ku gavan biavêje. Dewlet her carê hewl dide lîstikan bilîze. Serok, ji bo gelê Newroz pêşwazî kirî silav şandibû. Di esasê xwe de ev ji dewletê re bersivek bû. Heke em niha xwedî li pêvajoyê derkevin û bibin yek, dê dewlet zû gavan biavêje.” 

 

Ruzgar, daxuyand ku heke Kurd bibin yek dê bikarin bi dewletê gavan bidin avêtin û axaftina xwe wiha qedand: “Bi saya têkoşîna gelê Kurd dewlet neçarî vê bû û Kurd qebûl kir. Dîsa bi mezinkirina têkoşînê em ê bikarin bi dewletê gav bidin avêtin. Divê gelê me di vê pêvajoyê de yek be. Têkoşîn ji bo me jiyanî ye, serkeftin a me ye.” 

 

MA / Rûkiye Payîz Adiguzel