Çalakiya nobetê ya ku xelkê Wanê li dijî hewldana tayînirkirina qeyûm a li Şaredariya Bajarê Mezin a Wanê daye destpêkirin, di roja 4’emîn de didome. Gelê bajêr ku xwedî li îradeya xwe derdikeve, bi şev û roj û tevî hewayê sar jî li ber şaredariyê nobetê digire û qada berxwedanê naterikîne. 

 

Welatiyên li ber xwe didin, ji ajansa me re axivîn. 

 

‘NE 3 ROJ EM Ê HETA 3 SALAN JÎ BISEKININ’

 

Yek ji welatiyên di çalakiyê de jî Zehra Akkoyun a 50 salî ye. Tevî hewayê sar tev li nobetê bûye û got ku ew ê rê nedin tayînkirina qeyûm. Zehra Akkoyun, got: “Em ê şaredariya xwe nedin wan. Ji bo vê ne 3 roj hewce bike em ê 3 salan jî nobetê bigirin. Heke şaredariyê ji me bistînin, dê sibe hewl bidin tiştên din jî ji me bistînin. Lewma divê em bi tu awayî paşvegavê neavêjin. Gelê Wanê heta niha berxwedaneke mezin nîşan da û dê bêhtir li ber xwe bide. Bajarên derdorê jî piştgiriyê didin û ev yek hêviyê dide me.” Zeyra Akkoyun, diyar kir ku ev nêzî sê meh in qala çareseriyê tê kirin lê li rexa din qeyûm li şaredariyan tên tayînkirin û ev tişt anî ziman: “Di vê rewşê de aştî dê çawa bibe? Em ji gotinên wan bawer nakin. Baweriya me bi wan nemaye. Ji bo aştiyê em ji gelê xwe bawer dikin. Vaye hûn dibînin bi şev û roj nobetê digirin. Rojê ka 2-3 saetan radizên yan na. Lewma em ji gelê xwe bibawerin.” 

 

‘EM Ê RÊ NEDIN WAN’

 

Ahmet Bulak jî 56 salî ye û ji roja ewil ve di çalakiya nobetê de cih digire. Bulak, got: “Gelê me gelekî berxwedêr e. Vaye hûn jî dibînin, xew nîne, her kes 24 saetan li ser pêyan e. Tiştên li gelê Kurd tên kirin zilm û heqaret e. Li rexekî qala aştiyê dikin li rexa din jî qeyûman tayîn dikin. Em vê qebûl nakin. Em bi tu awayî qeyûman nas nakin. Gelê me seknekî birûmet raber dike. Me çawa piştî hilbijartinê li ber xwe dabe, dê niha jî bi heman biryardariyê li ber xwe bidin. Me duh çawa rê nedabe wan dê îro jî rê nedin.” 

 

‘HÊJ JÎ DIJMINATIYÊ DIKIN’

 

Haci Suleyman Borak jî bi bîr xist ku beriya niha jî qeyûm hatibûn tayînkirin lê wan tu caran serî netewandine. Borak, ev tişt anî ziman: “Gelê Kurd kefenê tirs û mirinê çirandiye. Hêj jî dijminatiyê dikin. Heke dijminatî nekiribûna, ev 50 roj in li rexekî qala aştiyê li rexa din jî ev neheqî û bêhiqûqtî nedikirin. Aştî wiha nabe. Heke serokkomar kesekî biedalet bûya, dê wekî hev nêzî herkesî bûbûya. Em xwecihên vir in, lê ew jî Asyaya Navîn hatine. Li vî welatî em bi hev re dijîn, çawa mafê jiyanê yê kesên din hebe, yê me jî heye. Li seranserî cîhanê kîjan gel bi qasî me Kurdan di bin zext û zilmê de ye? Ziman, çand û îradeya me tune tê hesibandin. Çiqas polîtîkayên qirêjî yên pişaftinê hebin, tevekan li ser gelê Kurd didomînin. Ez bangî Erdogan dikim; heke li gel aştiyê bî, heke tu ji dil bî wê demê dev ji vê polîtîkaya xwe ya qirêjî berde. Li pêşiya Rêberê Gelê Kurd nebe astengî ku bangî gelê xwe û tevgera xwe bike. Yê ku dikare aştiyê pêk bîne, birêz Abdullah Ocalan e. Ez li vir dîsa bang dikim; dev ji êrişên ser şaredarî û hevşaredarên me berdin. Em li vir in, em bi îradeya xwe re ne û heta encamê bidest dixin jî em ê çalakiya xwe ya nobetê bidomînin.”

 

JI BEDLÎSÊ TEV LI NOBETÊ BÛ

 

Bêrîvan Canbey jî ji Bedlîsê ye û ji bo piştevaniyê hatiye Wanê û di nobetê de cih digire. Bêrîvan Canbey, wiha got: “Ev neheqiya li vir tê kirin dê li tu cihan û bi tu awayî neyê qebûlkirin. Em bi kelecaneke mezin hatin û me li vir heman kelecan dît. Ne cara ewile ku qeyûman tayîn dikin. Beriya niha jî li gelek şaredariyên me qeyûm tayîn kirin.  Çalakiya li dijî qeyûm li ku derê hebin ez ê li wir bim. Ji ber ku qeyûm neheqî ye, zilm e. Dema li dijî neheqiyê dernekevî ew neheqî dê mezintir bibe. Lewma me xwest ji vê neheqiyê re bibin bersiv. Divê ev berxwedan bê mezinkirin. Dema her kes bû yek wê demê dê dengê me bilindtir derkeve.”