Desteya Rêveber a Navendî ya DEM Partiyê têkildarî salvegera Komkujiya Geliyê Zîlan daxuyanî da û ev tişt diyar kir: “Di encama polîtîkayên înkar û redkirinê de ku bi Zagona Bingehîn a 1924’an destpê kir, mejiyê dewletê gelê Kurd bi rengekî sîstematîk bi komkujî û sirgûnan re rûbirû hişt. Di encama komkujiya li Geliyê Zîlan a li navçeya Ercîş a Wanê de ku sala 1926’an destpê kir, heta 1927’an û 13’ê Tîrmehê 1930’an pêk hat, bi deh hezaran mirov hatin qetilkirin û bi sedan gund hatin şewitandin û hilweşandin. Bi deh hezaran mirov ji xaka xwe hatin sirgûnkirin û herêm bi fealiyetên endezyariya siyasî û polîtîkayên nifûsê, rû bi rûyê paqijiyeke etnîkî hate hiştin."

 

96 SAL DERBAS BÛN

 

DEM Partiyê bi bîrxist ku 96 sal li ser komkujiyê derbas bûne jî, têkildarî komkujiyê ti hevrûbûneke fermî pêk nehatiye, dewletê navê komkujiyê jî bi bîr neaniye û wiha hat gotin: "Li erdnîgariya ku komkujî lê pêk hatiye, ne kevirekî hafizayê, ne lêborînek, ne jî şopa edaletê heye. Yek ji kevirên bingehîn ê Pêvajoya Aştî û Civaka Demokratîk, hevrûbûna bi rabirdûyê û heqîqetan re ye.”

 

'BILA BIBE CIHÊ HAFIZAYÊ'

 

Di daxuyaniyê de hate destnîşankirin ku Geliyê Zîlan divê weke cihê hafiza û hevrûbûnê were parastin.  DEM Partiyê herî dawî wiha got: “Weke DEM Partî em di salvegera 96’an de bi deh hezaran canên ku me di Komkujiya Zîlan de ji dest dane, bi rêzdarî û rehmet bi bîr tînin. Ji bo berpirsyar li pêşberî dîrokê bên mehkûmkirin û careke din ev êş neqewimin, em ê têkoşîna xwe bidomînin.”