Dorpêçkirina Kobanê 19 roj in berdewam dike. Ji ber nebûna pêdiviyên bingehîn li Kobanê, pênc zarokan jiyana xwe ji dest dan. Li dijî ambargoya li ser Kobanê kampanyayên alîkariyê hatin destpêkirin. Endamên Platforma Parastin û Hevgirtinê ya Bajêr a Amedê di çarçoveya kampanyayê de kamyonên ku av, xwarin, potikên zarokan û pêdiviyên germkirinê hildigirtin, ber bi Deriyê Sînor ê Murşîtpinarê ve hatin şandin. Kamyon bi rojan li ser sînor hatin sekinandin û rê li ber derbasbûna wan hat girtin. Niştecihên Amedê ku der barê vê astengiyê de em bi wan re axivîn, xwestin ku deriyê sînor bê vekirin.

 

Welatiyên ku li hember astengkirina alîkariyan bertek nîşan dan, bal kişandin ser nakokiya di navbera gotinên li ser aştiyê û pratîkên li qadê. Welatiyan bi pirsa "Ger behsa pêvajoyekê tê kirin, çima rê li ber alîkariya mirovî nayê vekir?", diyar kirin ku astengkirin xwegihandina xelkekî bê av û elektrîk cezakirineke eşkere ye. Welatiyan destnîşan kirin ku tiştê li Kobanê diqewime êrişeke li dijî tevahiya gelê Kurd e û xwestin ku Deriyê Sînor ê Murşîtpinar tavilê bê vekirin û peymanên hatine îmzekirin werin pabendkirin.

 

Welatiyan anî ziman ku ew ê hevgirtina bi Kobanê re xurttir bikin.