
Yekitiya Êzidiyên Sûriyeyê êrişên li dijî Elewiyan şermezar kir 

2025-12-29 11:41:58


	&nbsp;

	NAVENDA NÛÇEYAN - Yekitiya Êzidiyên Sûriyeyê têkildarî êrişên hêzên girêdayî hikûmeta veguhêz a Şamê yên li dijî Elewiyan, daxuyanî da û ev êriş şermezar kir. Di daxuyaniyê de bal kişand ser girîngiya pergala nenavendî.&nbsp;

	&nbsp;

	Yekitiya Êzidiyên Sûriyeyê têkildarî êrişên hikûmeta veguhêz a Sûriyeyê yên li dijî xwepêşandêrên li herêmên perav û naverasta Sûriyeyê daxuyaniyek weşand. Yekitiyê, êrişên hêzên hikûmeta veguhêz ên li dijî xwepêşandanên aştiyane bi tundî şermezar kir û piştgiriya xwe ji bo xwepêşandêran ragihand.

	&nbsp;

	BAL KIŞAND SER PERGALA NENAVENDÎ&nbsp;

	&nbsp;

	Yekitiyê, diyar kir ku mîsyona hikûmeta veguhêz ew e ku hewayên guncav ji bo avakirina pergalekê ye ku tevahî pêkhateyên gelê Sûriyeyê jê razî be, ne ku pergaleke yek reng û yek teşe bi hêzê li ser her kesî ferz bike û hemû cureyên terorê bi kar bîne.

	&nbsp;

	Yekitiyê di dewama daxuyaniyê de destnîşan kir ku "Çewisandinên ku hatine kirin digihêjin asta komkujiyên li dijî pêkhateyên welat mîna Elewî, Durzî, Xiristiyan, Êzidî, Kurd, Ermen û Suryan, Erebên Sunne yên sivîl, hêzên siyasî yên cuda yên bi mafên mirovan û nirxên demokrasiya sivîl bawer in."

	&nbsp;

	Yekitiyê diyar kir ku redkirina nêrînên cuda wê nikaribe daxwazên rewa yên pêkhateyên Sûriyeyê ji bo jiyaneke siyasî û ewle ya durust bêdeng bike.&nbsp;

	&nbsp;

	Yekitiya Êzidiyan, piştgriya xwe bo her kesê ku doza azadî, demokrasî, fedralîzm û nenvendîbûnê dike, nîşan da. Her wiha ji bo malbatên zarokên xwe winda kirine sersaxî û ji bo birîndaran jî şîfaya xêrê xwest. Her wiha yekitiyê banga berdana girtiyan kir.&nbsp;

	&nbsp;