Konfederasyona Sendîkayên Karkerên Şoreşger ên Tirkiyeyê (DÎSK) bi munasebeta salvegera 56’emîn a berxwedana karkeran a di 15-16’ê Hezîrana 1970’an li Parka Yogurtçu ya Kadikoy a Stenbolê daxuyanî li dar xist. Di daxuyaniyê de pankartka “Li dû şopa berxwedana 15-16’ê Hezîranê ya birûmet, di têkoşîna edalet û azadiyê de” hate hilgirtin û dirûşmên “Roj dê were, AKP’ê hesab bide” hate berzkirin. Metna daxuyaniyê ji aliyê Seroka Giştî ya DÎSK’ê Arzu Çerkezoglu ve hate xwendin. 

 

Arzu Çerkezoglu anî ziman ku 15-16’ê Hezîranê ji bo çîna karkeran bîrek hevpar e, qala axaftina damezirînerê DÎSK’ê Kemal  Turkler a di 14’ê Hezîranê de kir û ev tişt got: “Serokê me yê damezirîner Kemal Turkler, di wê civînê de wiha gotibû: ‘Em karker in, yê ku li cîhanê her tiştî dike karker e. Hevalno, ger karker rawestin û tu tiştekî nekin dê cîhan raweste. Dê keştî, balafir û kargeh û hemû wesayît rawestin.’ Pişî vê axaftinê hemû karker ketin nava tevgerê. Bi sedan kes rabûn ser pêyan. Kargeh vala bûn. Ji bo pêşî li vê tevgerê bigirin barîkat hatin danîn, pire hatin rakirin û gule hatin teqandin. Sê birayên me yên karker Yaşar Yildirim, Mustafa Bayram û Mehmet Gidak jiyana xwe ji dest dan. Lê tu hêzekî nekarî têkoşîna rêxistinkiri ya karkeran rawestîne. Erka me ya îro diyar e; em ê xwedî li nan, li ked û li mafê xwe derkevin.”