Nûnertiya Herêma Anatoliyaya Navîn a Konfederasyona Sendîkayên Karkerên Şoreşger (DÎSK), Platforma Şaxan a Enqereyê ya Konfederasyona Sendîkayên Kedkarên Cemaweriyê (KESK), Lijneya Koordînasyona Bajar a Enqereyê ya yekitiya Odeyên Endezyar û Avahîsazên Tirk (TMMOB), Odeya Bijîşkan a Enqereyê (ATO) û Odeya Muhasîbên Serbest û Rawêjkarên Darayî ya Enqereyê (ASMMMO), li Cadeya Yukselê kom bûn û deklarasyona 1’ê Gulanê Cejna Karkeran a Cîhanê aşkera kirin. 

 

Di daxuyaniyê de pankarta “Ji bo mafê kedê, ji bo edalet, aştî û demokrasiyê em li Tandoganê bibin yek û biguherînin” hate hilgirtin. Daxuyanî, ji hêla Nûnera Herêma Anatoliyaya Navîn a DÎSK’ê Bîrgul Kayayê ve hate xwendin. 

 

Bîrgul Kayayê diyar kir ku nirxên ji karker û kedkaran tên dizîn pêşkeşî rantxwir, faîzxwir, sermayedar û lêçûnên şer tên kirin û got: “Mafên perwerde, tenduristî, cihê hewînê û veguhestinê ku mafên sereke ne jî veguherendine qada rantê. Daxwazên gel veguherandine mijarên siyasî û bi rêya darazê tên tepisandin.” 

 

Bîrgul Kayayê da zanîn ku tevî vê rewşa tarî û binpêkirinên giran ên mafan jî ew xwedî îrade ne û bibiryar in. Bîrgul Kayayê, diyar kir ku rizgariya bi tenê nîne û divê bibin yek, xwe birêxistin bikin û bi hev re têbikoşin. Herî dawî jî bang li her kesî kir ku di 1’ê Gulanê de biherikin Qada Tandoganê û banga hevgirtin û têkoşîna hevpar kir.