
Ahmet Turk ji doza weke hinceta tayînkirina qeyûm hatibû nîşandan beraet kir 

2025-10-23 13:55:58


	&nbsp;

	MÊRDÎN - Di danişîna doza Ahmet Turk de ku bi îdiaya “propagandaya rêxistinê” tê darizandin û weke hinceta tayînkirina qeyûm a li Şaredariya Bajarê Mezin a Mêrdînê hatibû nîşandan de beraet kir.&nbsp;

	&nbsp;

	Danişîna biryarê ya doza Hevşaredarê Bajarê Mezin ê Mêrdînê Ahmet Turk ku di 4’ê Mijdara 2024’an de ji hêla Wezareta Karên Hundir ve ji peywirê hatibû dûrxistin û bi îdiaya “propagandaya rêxistinê” tê darizandin, li 14’emîn Dadgeha Cezayên Giran a Enqereyê hat lidarxistin. Bi hinceta axaftina Ahmet Turk a di 28’ê Adara 2011’an de li herêma Newala Qesaban a Sêrtê têkildarî cînayetên kiryarnediyar kiribû, di sala 2022’yan de bi îdiaya “propagandaya rêxistinê” doz hatibû vekirin. Parêzerên Turk, Erdal Kuzu û Tahar Erdem ji Edliyeya Mêrdînê bi rêya SEGBÎS’ê tev li danişînê bûn. Danişîn, piştî xwendina ewraqên li dosyayê hatine zêdekirin û tespîtkirina nasnameyan dest pê kir. Dadgehê, ji dozger xwest ku mutalaaya xwe pêşkeş bike.&nbsp;

	&nbsp;

	Dozger, xwest Ahmet Turk bi heman îdiayê were cezakirin. Parêzerên Tur jî gotin ku Ahmet Turk siyasetmedar e û darizandina wî ya ji ber axaftineke di sala 2011’an de derqanûnî ye. Parêzeran, got ku dosya ketiye ber demborînê û bi bîr xistin ku Serdozgeriya Komarê ya Sêrtê di sala 2014’an de ji bo vê dosyayê biryara “neşopandinê” da ye lê tevî vê jî Serdozgeriya Komarê ya Enqereyê biryara neşopandinê paşguh kiriye û îdianame amade kiriye. Parêzeran got ku diviyabû dosya bi salan berê bihata girtin û daxwaza beraetê kirin.&nbsp;

	&nbsp;

	BIRYARA BERAETÊ HAT DAYIN

	&nbsp;

	Dadgehê, diyar kir ku axaftina Ahmet Turk dikeve çarçoveya “azadiya xweîfadekirinê” de û bi sedema ku “hêmayên sûc çênebûne” biryara beraetê da.&nbsp;

	&nbsp;

	KIRIBÛN HINCETA TAYÎNKIRINA QEYÛM

	&nbsp;

	Di 4’ê Mijdara 2024’an de cara sêyemîn li Şaredariya Bajarê Mezin a Mêrdînê qeyûm hate tayînkirin. Wezareta Karên Hundir jî piştî tayînkirina qeyûm daxuyanî da û dosyaya dozê ya bi hejmara 2022/142 a li Dadgeha Cezayên Giran a Enqereyê didomiya weke hinceta tayînkirina qeyûm nîşan da. Wezaretê îdia kiribû ku di çarçoveya dosyayê de bi îdiaya “propagandaya rêxistinê” qeyûm hatiye tayînkirin.&nbsp;

	&nbsp;